UCHOLAJ TZIJ

Kqak’utwachij we nab’e ucholaj jun tzijol wuj, ri man junam ta ruk’ ri kasik’ij uwach ronojel q’ij, rumal chi chupam wa’ we wuj are kajawax ri to’ow ib’. Are karaj kuk’ak’arisaj ri ub’anikil ri tzijon ib’ chi kixo’l ri aj landivarianos, jacha taq ri: tijoxelab’, ri tijonelab’, ri ajchakib’ yey konojel ri winaqib’ ri ketob’anik rech junelik kub’an ri je’l uchak we nimatijob’al.

Xuquje’ kaqaj kaqaya kiq’ij chupam wa’ we tzijol wuj, konojel ri winaqib’ ri kakiya uq’ijil ri qachak patan, rumal we nimatijob’al are kutzukuj ri utzilal chi kixo’l ri winaqib’, rumal ri’ are karaj kuya jun k’ak’ chomanik chi rij ri qas ub’anikil ri uk’aslemal ri winaq. Tajin kaqatzukuj jachin taq kakaj ketob’an quk’ pa we qatzijol wuj. Qas tzij kaqoyob’ej ri jalajoj taq ina’oj ichomab’al chi rij we qatzijol.

Ri kaqaj are, jacha jun Brújula, kaqaya uq’ijil jun k’ak’ ub’anikil ri jalajoj taq chomanem jawi katzijox wi, kasol wi rij jalajoj taq rajawaxikil, rumal chi sib’alaj rajawaxik kajalk’atix wa’ rech ma junam ta ruk’ ri b’anom uloq, rumal man qas ta pa ub’eyal kab’an chi uq’alajisaxik ri kajawaxik.
Chata pe’, we nimatijob’al yalaj kuk’is ri kawinaq lajuj ujunab’. Are wa’ nab’e nimatijob’al xokik chi kiwach ri nik’aj chik ri ma e rech ta q’atb’al tzij. Jun chi ke ri je’lataq chak qab’anom are ri jalajoj taq uq’ab’ keriqitaj pa nik’aj taq tinamit chik rech we Iximulew. Ri Brújula are jun ch’awem kel b’i pa we uk’u’x we nimatijob’al, xa k’u karaj kuta ri kich’awib’al ri aj URL ri e k’o pa taq nik’aj chik tinamit xuquje’ ri kich’awib’al konojel ri xa kakita qatzijol.

Kaqaj kaqaq’axej pa jujun taq Maya’ ch’ab’al ch’uti’q xuquje’ je’lataq tzij, rech kopan ri qach’awib’al kuk’ ri qawinaqil ri xa xew kojkita chi kipam ri taq q’axeb’al taq tzij. Sib’alaj nim upetik ri’ ri kina’oj kichomab’al ri jalajoj taq komon –jawi ri uk’ayewalil ri k’aslemal man junam ta ruk’ pa we tinamit- rech qas tzij pa ub’eyal kab’an chi utzukuxik rutzil ri kajawax chi qe qonojel pa we Iximulew.

Pa we nimatijob’al Landivar ri qas uk’u’x ri qachak patan are wa’: ri tijonem, ri uk’otik uxe’, utzukuxik rutzil jalajoj taq na’oj chomab’al, xuquje’ ri kopan wi ri kb’anataj waral. Are wa’ ri kojk’extaj wi kuk’ ri nik’aj chik nimatijob’al. Pa ri tijonem k’o ri k’ak’ taq jastaq. Tajin kaqaya kiq’ij nik’aj chik ub’eyal, ruk’ wa’ kaqilo chi xa utz ri chak tajin kaqab’ano. Pa ri chak patan xuquje’ k’o je’lataq b’anoj, kab’lajuj institutos e k’olik, chi jujunal kakib’an jalajoj taq chak, ruk’ wa’ kojtob’an chi usolik rij ri k’extal taq k’ayewalil kojriqitaj wi kamik pa we qanimatinamit.
Xa k’u amaq’el k’o ri ma kaya’taj taj: Man kqatzijob’ej ta qib’. Rumal ri’ chupam ri jun k’ak’ Vice.rectoría rech k’i taq chak patan, xqachomaj chi rech ri qachak patan kb’ewachin xa jawi chi’, rajawaxik chi are nab’e kqachakuj rij jun tzijob’al qech qas tz’aqat . Ruk’ k’u wa’ kux wi ri Brújula Landivariana.

Ri ub’i’ we qatzijol wuj kojuto’ chi uriqik ri qab’e, karaj kuk’utu, kuk’am qab’e. Wa’ we jun brújula man utukel taj kachakunik, rajawaxik chi pa wokaj, pa puqaj kachakun wi. Xuquje’ are jun je’lak’olib’al jawi kata’taj wi ri ach’awem, achomanem, ronojel jas ri kawaj.